ما بعد العزاء

مساااء الخير...

اخباركم شباب جد مشتاق لكم ولبيتي البلوقر..

بالاول اعتذر على الانقطااع هذا,, ويمكن ما رديت على بعضكم من يكلمني ماسن على الفون,, لان كنت مشغول بالعزاا وما كنت اقدر ارد في نفس الوقت..

ثانيا,, اشكر كل من عزاني وعلى رأسهم غرور حبيب قلبي,, وتركوازي,, مستر احمدووه,, ونص قلب,, وعثمااان فديته,, وحمودي,, وغيرهم والسموحة ما قدرت اتذكرهم الحين,, بس بالقلب موجودين,,

الايااام الي طاافت,, كانت تجربه يديده تمر فيها عايلتنا كلها كبيرها وصغيرها,,, ما كنت احب هلتغيير وجمعتنا وكسر كل حواجز الخلافات يكون في وفااة واحد منااا,, كنت اتمناها بالافراح والاعيااد,, لكن هذا المكتوب والي صار بعد تقريبا على اخر جمعه لنا كانت قبل 9 سنين على الاقل,, يوم الاحد الي طااف انجمعنا كلنا تحت سقف واحد وننعى ونعزي بعض بوفاة عمي الصغير,,, والموت ما يعرف لا صغير ولا كبير,,

والحلوو بجمعتنا,, انها كانت اكثر واكثر واكثر واكثر مره حسيت فيها ان احنا قراب لبعض,, والصغير قبل الكبير,, اكيد..

لان احنا الشباب ما بينا خلافات, صحيح البعد كان بسبب الكبار,, لكن الشباب ودهم بالقرب اكثر من البعد,, اكثر عيال عمي حسيتهم مهمومين ويبون بس يشكون لحد يفضون له.. وكان اكبرهم هو المتقدم بهلشي,, كلامه لنا وصراحته محت كل المسافات الي بينا,, ومجودي فديته اكثر عيال عمي شبه فيني,, بأسلوبه وتصرفاته صحيح مو ظاهره فيني كثر ما ظاهره فيه,, لكن هوو الاقرب,,

ولاول مره اشوف عيالهم,, واعرف اساميهم واقعد وياها ونضحك,, جد جد لحظاات حلووووه حيل حيل حيل,,,

لكن بنفس الوقت شفت الحقد في قلب 2 من عيال عمي,,, مهما تستروا عليه تفضحهم انفسهم,, ما ادري ليش احس جيي ومو بس انا الكل ملاحظ هلشي,, بعد.. لكن ما اقول الا الله يهدي قلوبهم مثل ما هدى خوانهم ,,,

امس صار وياااي موقف,, فرحت فيه وتضايقت وبحسره,,, كنت لابس شماغ ودااش على الصاله فيها بنات عمي امي واعياالهم,,, والا يجني اصغر عيالهم توه يمشي وشوي يتكلم,, وقال لي وهو رافع ادينه عشان اشيله "بابا" ,,, لوووول جد جد جد وقتها طاار قلبي من الفرح وختنقت بعبرتي لكن داريتها عشان محد يحس,, "ما ادري شقول والله" لكن اتمنى يكون لي ولد واحد,, ومن الانسانه الي احبهااا,, مو مجبور عليها..

بخصوص جامعتي,, للحين النتايج ما طلعت,, ومتوتر حيل,, والله يستر من النتايج الي تتأخر جيي,,

وبخصوص الطبيب النفساني,, اول امس امي فاتحتني بالموضوع مره ثانيه,, واكدت علي اني اروح ,, وطبعا ما عارضتها لكن الطبيب يكون بختياري,,

وبخصوص حبيبتي يمكن اول مره اتكلم في هلموضوع من فتره طويله,, واقول انا نادم على اني طلقت لكن بنفس الوقت هلطلاق قربنا لبعض اكثر من اي وقت مر علينا,, صرنا مجانين بعض لدرجة كبيره وفوق ما تتصورون,, وطبعا عمري ما حسيت انها طليقتي كثر ما انها مرتي زوجتي وام عيالي ان شاء الله,,

واتمنى من الله عز وجل ما يخيب ظنا ويجمعنا على الخير ولا يفرقنا طول العمر,,

في محاولات بان نرجع لبعض لكن الحين شوي تأجلت بسبب العزاا ويمكن فيها صالح,,, لكن اهلي مو ساكتين عن الموضوع وخاصه بعد ما فاتحتهم بالموضوع,,, ودوم يدعون لي بان ترجع الامور مثل قبل واكثر,,, والاهم انهم ما يدرون ان احنا نكلم بعض هههههههه ولا بنروح فيها,,, 

كالعادة احط لكم المسلسلات الي اتابعهم وهلمره 2 ,, الاول سبارتكس والثاني المختار الثقفي فلم ايراني تاريخي مدبلج,,, طبعا سبارتكس ما انصح الي قلبه ضعيف يشوفه والي متحفظ واايد لان فيها دم ومقاطع اباحيه,, فانصحه يشوف فلم المختار افضل له ^^...

المختار الثقفي

مسلسل "المختار" یروي سيرة و ثورة المختار بن أبي عبيد الثقفي المعروف بأبي اسحاق. طالب المختار بالثأر لاستشهاد الإمام الحسين عليه السلام في كربلاء عام واحد وستين للهجرة وتمكن من قتل جميع قتلة الامام الحسين (ع).

قصة المسلسل تبدأ من أواخر أيام حياة الإمام الحسن عليه السلام عندما کان المختار شابا حیث یستعرض الأحداث التي انتهت بالصلح بین الإمام الحسن(ع) ومعاوية بشرط أن تؤول الخلافة إلى الإمام الحسن (ع) بعد وفاة معاوية أو إلى الإمام الحسين (ع) إن لم يكن الامام الحسن(ع) على قيد الحياة. كما يتحدث المسلسل عن موت معاویة ونکثه لشروط الصلح بتوريث الحكم لابنه یزید وهي الامور التي أدت فيما بعد بالاضافة الى عوامل أخرى الى استشهاد الإمام الحسین (ع) وصحابته في واقعة کربلاء المقدسة.

مسلسل "المختار" للمخرج المعروف داوود مير باقري و بلغت عدد حلقاته الاربعين واستغرقت مراحل البحث فيه وكتابة السيناريو والتصوير تسع سنوات حيث تم بناء ديكورات أربعة مدن اسلامية هي مكة والكوفة والمدائن وكربلاء وقام بتمثيل الادوار الاصلية فيه أكثر من 100 ممثل بينهم العديد من كبار الممثلین الايرانيين.

الحلقة الاولى

الحلقة الثانية

الحلقة الثالثة,,

الحلقة الرابعه,,

Spartacus Gods of the Arena Pt.III " torrent "

تحميل

يالله نشوفكم بوست يديد

وقريب ان شاء الله

تحياتي