Summary of the previous year .. New Year ^ ^

السلام عليكم ورحمة الله..

اخباركم ان شاء الله بخير... اليوم هلبوست عن السنة اليديد.. وبشكل عام اتكلم عن اهم شي صار السنة الي طافت ...

المهم.. كل سنة وانتم طيبين .. وبخير وبصحة وعافية ^^

نبلش اول شي بالسنة الماضية.. والانجازات الي فيها.. مع اني ما اعتبرها انجازات بس مواقف وامور .. صارت لي وبسرعه .. وبوقت اقل بوايد من الوقت الي تحتااجه .. هذا الي اشوفه غريب شوي فيها..

اول شي شخصيتي.. واايد واايد تغيرت لدرجة ان كل من حولي لاحظ هلشي .. واخر التعليقات الي قالت لي.. "انهم يشكون اني منتسب لمنظمة ارهابيه" ههههههههه شفتووا شلون المعااناة الي انا فيها ^^ ....

فمن اول السنة الي طاافت.. وانا قاعد انظم علاقاتي مع الناس,, وحسب درجة قربه لي.. ومدى معرفتي فيه.. يعني لا اتعدى خطوط الحدود الحمرى,, باي علاقة كانت حتى لو شخصية.. مع اني اكسر هلقاعدة شوي بس عشان اني اوصل للطرف الثاني فكرة معينه.. بعد ما استنزف عدم استوعابه كل محاولاتي ^^.. واغلب الاوقات يزعلون او يتضايقون من هلشي.. بس كل هذا لانهم غالين علي واايد...

اما عن التعارف.. يمكن هذي السنة اكثر السنين الي تعرفت فيها على نااس,,, كبير وصغير,, ومحترم .. وااطي ^^.. لكن هلشي حلوو انك تتعامل مع كل الفئات وتنسق علاقتك وياهم وتتعلم منهم امور كثيره.. وتكون رصيد لك بالمستقبل .. عشان تتجنب مواقف كثيره يمكن تصير لك... وافضل واحلى ناس تعرفت عليهم هلسنة... حتى على الشين الي فيهم.. كانت في اياام حلووه,, تغفر لهم هلشين الي بدر منهم ^^ وربي لا يحرمني منهم...

علاقتي ويا اهلي.. ما زالت من سنتين في توتر ... وكان اول سبب فيها رسوبي في الجامعه.. وكلام الناس في راس اهلي.. الي غيرهم واايد بدون ما يعرفون اسباب رسوبي شنو.. ومثل ما قلت لكم قبل.. يرجحون هلامور بانها من افعال الجن وخلافه :( ... وكان العصر الذهبي في السنتين الي طافووا,, هو ايام خطبتي وملجتي.. لكن الامبراطوريه وعصرها الذهبي .. انقلب لجحيم مستعر ^^ خوش تشبيه.. بدا الشك يدخل اهلي,, وهذا الي كان ناقصني بس ^^.. وما زلت اعاني منه لليوم هذا.. حتى بس اتكلم كلمة وحده .. يت لي التعليقات الي كلها نقزاات.. وكن يقولون لي حسين ندري انك قيي وشااذ.. او جنس مثل ما يقولونهاا.. بس بشكل غير مباشر.. مع اني كسرت هلشي .. مع اخوي وكم واحد من الربع.. وحتى مع واحد قريب مني .. وملتزم حيل.. بس اهلي للحين هلفكرة عندهم مثل الكابوس ولازم يعالجونه..

واخر.. اقتراحاتهم اروح لطبيب الهرمونات.. ورحت فعلا.. وما حصلووا شي علي ^^.. مع اني اعتقد الدكتور تستر علي بأمور قد تكون فيه احتماليه اني قيي .. واكبر دليل شفته منه.. انه سألني عن ميولي الجنسي..

وخلوته ويااي.. يعني قعدنا على انفراد ههههههه مو يورح بالكم بعيد... خلت اهلي يشكون حتى في الدكتور انه ما قال لهم كل شي.. وانه تستر على امور .. مع اني قلت حق اهلي الدكتور سألني عن كذا وكذا.. عن اني دخلت علاقات جنسية قبل ولا لا... وشلون ميولي الجنسي تجاه البنات والشباب,, طبعا انا قلت له كل شي طبيعي ^^ ..... ادري جذاااااب :)

بس انا ما يهمني كل هلامور غير اني ازيد وزني وهذا الي خلاني اوافق اروح لطبيب الهرمونات والغدد,,, ^^

وعلى فكره.. اهلي اخذوا التحاليل مني ههههههههه ما خلوها عندي ^^ الظاهر بعرضونها على دكتور ثاني.. وما استبعد هلشي عن اهلي ^^..

اما المظهر الخارجي.. طبعا واايد تغير عن قبل.. وخاصه طريقتي في اللبس.. وتركت الاسود والابيض.. الي كان هو المسيطر على اللوك ^^ ... اما االحين اتعمد البس الالوان الملونه وخااصه الي تربطها الوانها بالمثليه ^^...

والحين ياا دور دراستي.. طبعا هلسنة.. كانت شووي حلووه .. وعدلت شوي ونجحت بكم مقرر رسبت فيه ^^.. وما زلت اجااهد عشاان اطلع من الجوو الي كنت عايشه.. ^^..

وان شاء الله باقي لي 3 مقرارت على التخرج,, وابي دعواتكم لي .. بليييز بليييز...

وقبل لا انسى... لاحظت شي جديد علي.. وما ادري شنو سببه لكن لو مرت نصف سنه بدون ما اسافر.. احس نفسي مخنوق.. حيل.. واتنمى السنة اليايه ما يكون فيها هلاحساس.. لان احتمال كبير مافيه سفر للاسف... والله العالم

هذا بشكل عام عن السنة الي طافت... اما السنة اليديده.. ان شاء الله تكون احسن بواايد من الي طاافت..

وفي امور مسوي لها لسته .. وان شاء الله احاول انجز منها ولو نصفها ^^

نبدي بالترتيب,,, حسب الاهمية..

1- بحاول اني اتجاوز علاقات مع اشخاص"local people" لان علاقتي فيهم تحطني بوسط دوامه انا في غنه عنها.

2- بحاول اني امهد الطريق حق اهلي.. وبخليهم اكثر صراحه ويااي.. وننهي هذي الحرب البارده... الي كلها نغزات.. وانا بديت في هلشي.. ويااها من فتره..

3- بحاول اني احصل الشخص المناسب.. وبالظروف المناسبه الي تقربنا من بعض اكثر وتكون علاقتنا طويله وجديه اكثر...والمتغايرين ما يطلعون من هلدائره.. واقصد البنات.. اما الريايل المتغايرين لا مرحب فيهم ولا سهلا ^^....

4- بحاول اني ازيد وزني وبشكل طبيعي ومع مراقبة الدكتور ..

5- بحاول ادخل الجيم بعد ما ازيد وزني... عشان اضبط حالي ^^...

6- بحاول ادخل نشاطات .. عائلية وحتى عامة.. واتخلص نهائيا من هلوحده.. مع انها ما عادة موجوده مثل قبل ^^...

7- بحاول اغير امور في البيت خاصه.. من علاقات بين اهلي.. وان شاء الله بقدر اغير هلامور السلبيه فيهم.. وسبق وان اثرت فيه وغيروا امور للاحسن ^^...

8- والاهم والاهم... بحاول اتجاوز كل المواقف مهما كانت كبيره وصعبه.. لان لو انا انكسرت لها,, بتعب واايد... وانا زين يالله تعافية من اصعب موقف مر علي بحياتي ^^..

9- اتمنى اني احافظ على كل صداقاتي الحالية ^^..

10- سلامتكم خلصنا ^^..

هذا كل الي مرتبه للسنة اليايه...

وهذا اخر البوست... واشوفكم قريب مع بداية السنة اليديده ان شاء الله,,, الي اتمنى فيها لكم السعادة والراحة,,