مشاهد من فكري

بسم الله الرحمن الرحيم

اللهم صلى على محمد وال محمد

السلام عليكم ورحمة الباري

شخباركم عساكم بخير

والله مشتاااق لكم وللمدونه بعد انقطاع 

دام يومين لظروف الدراسة وانشغالي بالواجب

كبداية وبكل صراحة ما ادري شنو اكتب

الفكر شوي مشوش ... ومو مركز في فكره معينه

يمكن بسبب هليومين الي طافوا والتعب الي شفته فيهم 

ويمكن الظروف وتوتر العلاقات فيه اثر فيني ومن حولي...

فاليوم بيكون موضوعي عباره عن مشااهد

باخذه من الافكار الي تدور في راسي الحين

وبكون اوبن شووي... وباخذ راحتي

نبلش...

المشهد الاول...

المشهد هذا راح اتكلم فيه عن الحب... ووعشان نكون اوضح

العلاقات

اي علاقة كانت او بتكون وقبل لا تكون اي نوع من انواع العلاقات

لازم يكون فيها عامل اساسي واغلب هذي العلاقات ما تقوم الا فيه

وهو التفاهم والتفهم

شي لابد منه كا خطوه أولى في اي علاقة

ان انعدم التفاهم من الاخر وبالعربي الفصيح

لا تدخل فيها ولا تتعمق

لانها مهما دامت ومهما كان نوع هلعلاقة

يجي يوم بتنهدم وكأن شي لم يكن

وبمجرد خلاف بسيط او سوء فيهم الامور تتخربط 

وتكون صعبه انك تحلها بسهوله...

او تتخلص منها...

المشهد الثاني

بتكلم فيه عن الزواج شوي وان كنت يديد عليه

بس لي خبره ولو بسيطه...

والي بقوله اغلبه اطبقه في علاقتي الحاليه او بطبقه

طبعا في بداية اي علاقة مثل ما قلت بالمشهد الاول لابد من تفاهم وتفهم

ثاني شي... خصوصية الحياة الزوجية... يعني انها تكون بيعده عن تدخل اي شخص 

خارج نطاق دائرة الزواج... بمعنى اخر

تدخل الاهل والاصدقاء...

والاهم هم الاهل لان الاصدقاء انت تحط لهم الحدود وترسمها بدقه

انا اعتبر تدخل الاهل بدون ما تكون هناك شكوى من احد الطرفين واقصد

"الزوج والزوجة"

خط احمر وهني تكون بداية المشاكل

لان الاهل سواء من جانب الزوجة او الزوج

كل جانب منهم يفكر في مصلحة اولاده... وحتى لو كانوا الاولاد كبااار والشيب

تارس راسهم...

وكل جانب عنده فكره براسه يبي يطبقها

وحتى لو الاهل كانوا ملائكه... 

عن نفسي... اهلي لو تدخلوا ولو في كلمه بقول لهم هنا وبس 

هذي الحدود الرسمية بيني وبينكم.... ومن جانب البنت وان شفت

تدخلات ... راح تكون كلمتي "خلوا بنتكم عندكم" افضل لي ولبنتكم

شي ثالث... حدود الزوجة...

عندي الحين موو بالماضي لانها فكره يديده اكتسبتها من الحياة اليوميه

اي زوجة لا تعطيها سرك... ولا تقول لها كم عندك فلوس هههههه

ولا تقول لها عن علاقاتك الخارجية ومع الجنسين.. وان كان لهم ثالث هم سكر حلجك

سوري على هلسلووب... بس هذا الواقع

واضيف بعد لا تغرقها بالحب ولا تقسى عليها... خلك طبيعي

وكنت قبل مؤمن بان الحب لازم يكون قبل الزواج بس العكس هو الصح..

والحب يجي اليوم او باجر ... لان العشره مع اي شخص لها دوور في علاقتك معاه

واهم شي... لاتحط خدم... لان في هلخطوه ندم بعدها...

واهم واهم واهم شي... لا تخليها تسوق سيارة... 

لان بعدين بتعرف فايدة هلخطوه...

والزوج والزوجة.. اول وتالي حياتهم بتكون شراكه

بس بحدود انت ترسمها...

هذا الي عندي الحين... لو في يديد بفيدكم هههههه

المشهد الثالث...

وراح انقل لكم احداثه من الجامعة 

يوم السبت الي طاف - الساعه 6 الا ربع المغرب 

كالعادة اوصل شوي مبجر عشان الطريق ما تظمنه

ومنها اكون اجتمعت مع كم واحد من الربع بالجامعه وان كانوا نادرين

لان بطبعي ما اعطي ويه للمصلحجين ههههههه

المهم... وصلت للقاعه وكانت الدكتوره للحين مو واصله

فا وقفت مع الربع ندردش شووي... فسألني اكبر واحد في القاعه ... بالسن

وكان اكثر شخص قريب لي واخذ راحتي معاه ولو كانت بحدود..

سألني وقال وين كنت الاسبوع الي طاف... ما شفناك

قلت له ... مسافر والله

قال.. وين وعسى استانست

قلت له... اي الحمدلله رحت لايران زيااارة..

قال.. والوجه تغير والبسمه ماتت .. وشعندك هناك عندهم وسكت

قلت له ... ابد سلامتك نغير جوو..

طبعا من بعدها تغير وكاني الحين مسوي جريمه

او

انه عرفني اني كافر... مثلا

حتى اني اكلمه يطنش مرات ويسوي نفسه ما يسمع..

وحتى الي طافني في المحاظره الي طافت ما عطاني ايااه مع اني قلت

ممكن تقولي شنو اخذتم الاسبوع الي طاف..

وقعد يسوي هلحركه يقلب الصفحات على السريع ويقوم ما خذنا شي مهم

ويرجع يسكر الكتاب... طبعا انا فهمتها "اني ماني معطيك"....

ما ادري الناس .. غريبه جذي ليش

المشهد الرابع...

اول امس ضافني شخص الصبح على الماسن

من اعضاء موقع دفنت ارت .. المختص بالتصاميم والصور الفوتوغرافيه

وطبعا بعد التعرف والخ...  سالني شنو مذهبي

طبعا كان ردي... شيعي للابد..

وشوي قال لي ممكن تشوف هلتصميم لي... ابي رايك فيه

قلت له ... ابشر ما طلبت شي

طبعا عطيته رايي وقلت له سو جي وجي..

رجع وقال لي في تصميم ثاني بدزه لك شوفه لي عشان بنزله

بقروبك قلت له ابشر

دز الملف مضغوط... طبعا ما قبلته.. لان سهل يكون فيه فايرس

قلت له فك الضغط .. قال لي كبير الملف فوق الخمسه ميقا...

وانا اشووف الملف بالضغط ما يتعدى 30 كيلو بايت

شنو من ضغط هذا الي يسوي جذي

صراحه شكيت في الموضوع

قلت له فك الضغط وارفع الصوره لي ودز الرابط

قال لي اوكى

وشوي رجع وعطاني الرابط وكان هم الملف مضغوط

قلت يالله بنزله واسوي له سكان...

ونزلته وسويت سكان وكان سليم..

فكيت الضغط... ما اشوف صوره ....اشووف برنامج

رجعت لها قلت له مافي صوره هذا برنامج

قال اي اضغط عليه هذي صوره قديمه.. على باله انا غبي هههه

ما ضغطت ولا شي قلت له شنو من صوره تكون برنامج ياخي

طبعا قعد يقنع فيني بس انا راسي يابس

حذفت الملف وقلت له ارفع الصوره وعطني الرابط

غير جذي اسمحلي ما اقدر افيدك...

قال: ان شاء الله خير...

وللحين هو عندي بالماسن ولا شفت الصوره 

بس ليش هذا الحقد كله...

وان سرقت الايميل شنو بتستفيد؟ 

المشهد الخامس

بخليه بعدين ....  تركوازي فديته والله قاعد يحن علي يقول بس كافي 

تكتب نوفل شنوو 

ههههههههه

بسمع كلامه وبختم

وقبل لا اختم شوفوا هلفيديووو ... ابي عربي مثل هلريال ماكوو

ويبقى الاصفر... حيا ً للابد

يالله اشوفكم في يوم ثاني

باجر ان شاء الله

في امان الله